Helgi Björnsson hlýtur Íslensku bókmenntaverðlaunin

/in /by

joklar_hb
Helgi Björnsson hlaut þann 10. febrúar Íslensku bókmenntaverðlaunin í flokki fræðibóka fyrir bók sína Jöklar á Íslandi.

Helgi er vel að verðlaununum komin enda bókin mikið og glæsilegt rit, byggt á áratuga rannsóknum Helga og samstarfsmanna hans við Háskóla Íslands og víðar. Í henni er lýst „jöklum þessa lands og sambúð þjóðarinnar við þá frá upphafi byggðar til okkar daga, hvernig jöklar hafa mótað landið og eytt. Bókin segir sögu þekkingaröflunar og skilnings á jöklum frá því fyrst var farið að rannsaka þá fram til nútímarannsókna. Rakin eru spor löngu horfinna jökulbreiða, hulunni svipt af landinu undir jöklum Íslands og greint frá líklegri framtíð þeirra,“ eins og segir í tilkynningu bókaútgáfunnar.

Myndefni er fjölbreytt enda Helgi ötull og snjall ljósmyndari en auk þess eru í bókinni fjöldi skýringarmynda, landakort, gervihnattarmyndir og þrívíð kort af landslagi undir jöklum sem nú birtast í fyrsta sinn almenningi á prenti.

Þeim sem ekki hafa landað eintaki af þessu merka riti er bent á að hafa samband við bókaútgáfuna Opnu, Skipholti 50b, s.578-9080, opna(hjá)opna.is

Aðalfundur og fréttabréf

/in /by

Aðalfundur Jöklarannsóknafélags Íslands verður haldinn þriðjudaginn
23. febrúar 2010 í Öskju, náttúrufræðahúsi Háskóla Íslands.

Efni fundarins: Hefðbundin aðalfundarstörf.

Að loknum aðalfundarstörfum sýna Gísli og Freyr Jónssynir myndir
úr leiðangri á Suðurskautslandið í nóvember síðastliðinn.

Nánari upplýsingar um aðalfund er að finna í nýútkomnu fréttabréfi sem má nálgast hér.

Jöklar á Íslandi – Helgi Björnsson

/in /by

joklar_hb

Í tilefni af nýútkominni bók Helga Björnssonar Jöklar á Íslandi munu Jöklarannsóknafélag Íslands og Hið íslenska náttúrufræðafélag standa að sameiginlegum fundi mánudaginn 30. nóvember. Þar mun Helgi Björnsson jöklafræðingur halda fyrirlestur undir yfirskriftinni Jöklar á Íslandi við upphaf 21. aldar og framtíðarhorfur. Fundurinn verður haldinn í Salnum í Kópavogi og hefst klukkan 17:15.

Bókin verður seld á staðnum og stendur félögum JÖRFÍ til boða með veglegum afslætti.

Árshátíð JÖRFÍ 14. nóvember í Þórsmörk

/in /by

Árshátíð Jöklarannsóknafélagsins verður haldin í Básum á Goðalandi helgina 14.-15. nóvember næstkomandi. Lagt verður af stað frá Select við Vesturlandsveg á laugardagsmorgni á bílum félagsmanna JÖRFÍ. Einnig verður boðið upp á sætaferðir frá Stóru-Mörk kl. 17.

Dagskrá:
-Lagt af stað frá Select við Vesturlandsveg kl. 10 laugardaginn 14. nóvember
-Gönguferð um Goðaland undir leiðsögn Madame X eftir hádegi
-Hátíðarkvöldverður hefst með fordrykk klukkan 18:30

Matseðill
*Fordrykkur á fæti
*Forréttur – Taðreyktur öfuguggi á blínisbeði með styrjuhrognum
*Aðalréttur – Draumur útilegumannsins með salati að hætti Höllu
*Eftirréttur – Snjóhvít jöklamús á öðru glasi

Aðrir drykkir en fordrykkur eru á ábyrgð hvers og eins.

Að loknum kvöldverði verða kyrjuð jöklamannaljóð við viðeigandi undirleik, ísköld skemmtiatriði borin á borð, dufl og dans fram eftir kvöldi þar sem harmonikkustemmning verður í hávegum höfð. Líkur á óvæntum gestum!

Á sunnudegi verður lagt af stað úr Básum uppúr hádegi.

Miðaverð er 6.000 kr, innifalið er matur á laugardagskvöldi og gisting í Básum. Miðasala mun fara fram 9.-11. nóvember hjá eftirtöldum:

*Valdi rakari – Rakarastofunni Dalbraut 1
*Finnur Pálsson – Öskju
*Jósef Hólmjárn – Veðurstofunni, Bústaðavegi

Fyrirspurnum varðandi árshátíð er svarað á sumarferd@gmail.com og hjá Ágústi í síma 894-5257.

Skemmtinefndin

Haustfundur JÖRFÍ 20. október í Öskju

/in /by

Haustfundur Jöklarannsóknafélags Íslands verður haldinn 20.október 2009 í Öskju, náttúrufræðahúsi Háskóla Íslands klukkan 20:00.

Erindi: “Áhrif vatns á hreyfingu jökla rannsökuð með gervitunglum.”
Eyjólfur Magnússon

Myndasýning: Brynjar Gunnarsson sýnir ljósmyndir úr vorferð 2008.

Nánar er fjallað um haustfundinn og fleira tengt starfsemi JÖRFÍ undanfarið í fréttabréfi sem nýverið kom út og má nálgast hér.