Sumarferð Jöklarannsóknafélagsins verður farin að Langasjó 6.-8. júlí eins og áður var auglýst í fréttabréfi félagsins. Lagt verður af stað á hádegi á föstudegi frá Select Vesturlandsvegi og farið á einkabílum, og miðað er við að koma að Langasjó síðla dags. Gist verður í tjöldum við skála Útivistar við Sveinstind en fararstjóri í ferðinni og leiðsögumaður verður Jósef Hólmjárn. Við Langasjó er ýmislegt að skoða og er ætlunin að eyða laugardeginum í gönguferð um svæðið, mögulega um Sveinstind, Fögrufjöll eða útfallið en það ræðst af áhuga. Á sunnudeginum verður ekið í rólegheitum frá Langasjó og staldrað við á áhugaverðum stöðum eins og tími og áhugi leyfir. Skráning í ferðina fer fram á netfanginu: sumarferd@gmail.com, eða hjá Hálfdáni Ágústssyni í síma 8659551. Frekari upplýsingar um dagskrá sumarferðarinnar birtast munu birtast hér á heimasíðu félagsins.

Félagar úr Jöklarannsóknafélaginu fóru hefðbundna mælingaferð á Mýrdalsjökul á uppstigningardag en ferðinni hafði áður verið frestað vegna veðurs. Veður á jökli var fínt og margir á jökli að sinna mælingum, JÖRFÍ við ákomumælingar, Jarðvísindastofnun við íssjármælingar auk veðurfræðinga frá Belgingi við tilraunir með fjarstýrðar mælingaflugvélar. Sem fyrr voru boraðar þrjár ákomuholur og reyndist þykkt vetrarsnævarins yfirleitt yfir meðallagi en enn er þó eftir að reikna úr niðurstöðunum. Í haust verður vitjað um holurnar á ný og þá kemur í ljós hve afkoma jökulsins fyrir þetta ár verður. RÚV var með stutta frétt um ferðina á vef sínum: „http://ruv.is/sarpurinn/frettir/20052012-5“, nærri 11. mínútu.

Jöklarauður á Mýrdalsjökli. Mynd: Valdimar Leifsson