Fréttir – Síða 11 – Jöklarannsóknafélag Íslands

100 ár frá fyrstu ferð í Grímsvötn – 31. ágúst 2019

5. september 2019/in Fréttir /by Katla

Þann 31. ágúst síðastliðinn voru nákvæmlega 100 ár frá því menn komu fyrst í Grímsvötn svo vitað sé. Þar voru á ferð tveir ungir sænskir jarðfræðingar, Erik Ygberg og Hakon Wadell. Þeir fóru upp Síðujökul seint í ágúst 1919 og höfðu með sér þrjá hesta sem drógu farangur og vistir á sleða. Í ferðinni fundu þeir Grímsvötn og nefndu Svíagíg. Þeir héldu síðan áfram för sinni austur eftir Vatnajökli og komu til byggða niður Heinabergsjökul eftir nokkra hrakninga. Ferð þeirra Ygberg og Wadell var mikið afrek en segja má með sanni að Grímsvötn hafi á þessum tíma, og e.t.v. alla tíð síðan, verið sá staður á Íslandi sem erfiðast er að fara til. Hæstu tindar á Grímsfjalli í Vatnajökli eru nefndir eftir þeim félögum, Svíahnjúkar, eystri og vestari. Nafnið Grímsvötn er hinsvegar mun eldra og kemur fyrst fyrir í heimildum kringum árið 1600.

Ferð Ygberg og Wadell hefði getað endað illa, en svartaþoka var þennan dag fyrir 100 árum þegar þeir héldu stefnunni nokkurn veginn í austnorðaustur frá Háubungu. Skyndilega stoppaði fremsti hesturinn og varð honum ekki þokað hvernig sem reynt var. Þá rofaði aðeins í þokuna og þeir áttuðu sig á að þeir voru staddir á brún hengiflugs. Hesturinn hafði augljóslega skynjað hættuna. Daginn eftir fóru Ygberg og Wadell niður í Grímsvötn og tóku myndir sem eru í dag mikilsverð heimild.

Til að minnast þessarar ferðar bætti Jöklarannsóknafélagið því verkefni inn í vinnuferð í skálana á Grímsfjalli, að halda upp á tímamótin. Alls tóku 22 þátt í ferðinni. Skálarnir voru málaðir og viðgerðum og viðhaldi sinnt. En að auki var stutt dagskrá laugardaginn 31. ágúst um Ygberg og Wadell, og farið á staðinn þar sem þeir komu fram á brún Grímsfjalls.

Magnús Tumi Guðmundsson

13. septemberferð í Jökulheima

25. ágúst 2019/in Fréttir /by halfdana

Brottför verður frá Reykjavík kl. 18 föstudagskvöldið 13. sept. og ekið í Jökulheima, þar sem gist verður báðar næturnar.

Hugmyndin er að ganga á Jökulgrindurnar á laugardeginum, frá skarðinu þar sem Grindakvísl fellur í gegnum fjallgarðinn og norður undir Kerlingar. Þar munum við skoða jökulmenjar frá því að Tungnaárjökull var hvað mestur. Það eru um 11 km norður í Kerlingar og víða hægt að slást í för með hópnum eða snúa fyrr við, en þá er hægt að aka slóðann inn að Sylgju og hitta á hópinn. Varaplan hljóðar upp á að skoða jökulmenjarnar austan við Jökulheima og ganga á Rata. Á sunnudaginn sjáum við fyrir okkur að ganga á Mána, og jafnvel fara um Þórisós til baka.

Sameiginlegt grill verður á laugardagskvöldinu og kannski stiginn dans á pallinum. Hver og einn greiðir skjálagjöld fyrir sig og farþegar bíla taka þátt í eldsneytiskostnaði.

Endilega skráið ykkur sem fyrst hjá Hlyni (hlynursp hjá gmail.com, s. 893-0336)

Með góðri kveðju,
Undirbúningsnefndin; Hlynur og Hrafnhildur

Sumarferð JÖRFÍ 9. – 11. ágúst – möguleikar á gistiplássi í skála

30. júlí 2019/in Fréttir /by halfdana

Eins og áður hefur komið fram verður sumarferð JÖRFÍ helgina eftir Verslunarmannahelgi, dagana 9.-11. ágúst og gist í tjöldum í Básum (sjá nánar á http://gamli.jorfi.is/). Útivist hafði samband við okkur um að losnað hefur gistipláss í skálanum. Þeir sem ætla í ferðina og vilja gista í skála þurfa að hafa beint samband við Útivist
https://www.utivist.is/. JÖRFÍ hefur ekki bókað nein skálapláss en nægt pláss er fyrir tjöld í Básum.

Óskað er eftir að fólk tilkynni þátttöku í ferðina í síðasta lagi þriðjudag 6. ágúst, til Þóru Karlsdóttur (tölvupóstur: thorakarls@gmail.com, sími: 866-3370). Eins og fram hefur komið verður farið á einkabílum. Þó svo að þú hafir ekki yfir jeppa að ráða er engin ástæða til að sleppa ferðinni. Reynt verður að finna öllum pláss í bílum og e.t.v. selflytja síðasta spottann sem ekki er fær nema jeppum. Við höfum líka í bakhöndinni að nýta daglegar rútuferðir (https://trex.is/tour/thorsmork/).

Sumarferð JÖRFÍ 9.-11. ágúst

10. júlí 2019/in Fréttir /by Katla

Sumarferð JÖRFÍ verður farin helgina 9. – 11. ágúst. Að þessu sinni verður farið í Bása í Þórsmörk og gist í tjöldum. Aðalþema ferðarinnar verður skoðun á ummerkjum um eldgosin í Eyjafjallajökli og á Fimmvörðuhálsi vorið 2010. Fyrstu daga gossins í Eyjafjallajökli komu heilmikil jökulhlaup niður Gígjökul, fylltu lónið og gerbreyttu landslagi framan við jökulinn. Þessi hlaup ásamt gosinu sjálfu eru nú komin í fræðibækur. Við eigum hinsvegar eftir að skoða þetta allt betur. Ætlunin er að kanna ummerkin, farvegi og aurkeilur, bera saman við Steinholtshlaupið sem varð í janúar 1967 og ef tími vinnst til, skoða önnur ummerki eins og hraunin sem mynduðust í gosinu á Fimmvörðuhálsi. Fararstjóri verður Magnús Tumi Guðmundsson.

Reiknað er með því að í ferðinni verði viðfangsefni við allra hæfi. Aukaþema ferðarinnar verður að eiga góðar stundir í góðra vina hópi. Félagsmenn, vinir og fjölskyldur velkomin.

Brottför verður úr bænum kl. 16 á föstudeginum. Við höfum tekið viðveruhús Útivistar í Básum frá fyrir laugardagskvöldið og tjaldsvæði fyrir 30 manns. Ef fólk vill gista í skála er rétt að hafa beint samband við Útivist. Farið verður á einkabílum og leitast verður við að finna pláss fyrir alla. Þátttaka í sumarferð tilkynnist Þóru Karlsdóttur, síma: 866-3370 eða netfangi: thorakarls@gmail.com.

Vorferð 2019

13. júní 2019/in Fréttir /by Katla

Sunnudaginn 9. júní lauk vorferð JÖRFÍ á Vatnajökul, þeirri 67. í röðinni, en fyrsta ferðin var farin 1953. Ferðin gekk mjög vel og okkur tókst að leysa af hendi öll verkefni sem áætlað var að vinna. Ferðin skiptist í fyrri og seinni hóp. Fyrri hópurinn var á ferðinni 29. maí – 4. júní, en sá seinni 4.-9. júní. Farið var um Skálafellsjökul en ekki Tungnaárjökul eins og venja er. Ástæðan er sú að Tungnaárjökull hefur hopað svo mikið að framan á síðustu árum að framan við hann er nú komin samfelld slétta með aurbleytu sem er ófær flestum farartækjum. Óvíst er hvernig verður á næstu árum, en vonandi finnst leið svo hægt sé að halda áfram ferðum um Jökulheima, enda er sú leið helmingi styttri frá Reykjavík en leiðin um Skálafellsjökul.

Klikkið á „read more“ til að lesa meira og sjá myndir.